Leviticus 27

Ukuhlenga okungokukaJehova

1UJehova wathi kuMosi, 2“Khuluma kwabako-Israyeli uthi kubo, ‘Uma umuntu esenza isifungo esingavamanga ukuba anikele abantu kuJehova ngokuqamba intengo engalingana umuntu, 3owesilisa eleminyaka ephakathi kwamatshumi amabili lamatshumi ayisithupha kabe ngamashekeli angamatshumi amahlanu esiliva kulinganiswa ngeshekeli lendlu engcwele. 4Nxa engowesifazana kakube ngamashekeli angamatshumi amathathu. 5Nxa kungumuntu oleminyaka ephakathi kwemihlanu lengamatshumi amabili owesilisa, isilinganiso akube ngamashekeli angamatshumi amabili, kuthi owesifazana kube ngamashekeli alitshumi. 6Nxa kungumuntu ophakathi kwenyanga eyodwa leminyaka emihlanu, owesilisa isilinganiso akube ngamashekeli amahlanu esiliva kuthi owesifazana kube ngamashekeli esiliva amathathu. 7Nxa kungumuntu oleminyaka engamatshumi ayisithupha kumbe edlula lapho owesilisa isilinganiso akube ngamashekeli alitshumi lanhlanu, kuthi owesifazana kube ngamashekheli alitshumi. 8Nxa umuntu owenza isifungo engumyanga, esehluleka ukukhupha isilinganiso esitshiwoyo, uzakusa umuntu lowo kumphristi onguye ozamisa isilinganiso esinganeliswa ngulowomuntu owenza isifungo.

9“ ‘Uma lokho akufungelayo kuyisifuyo esamukelekayo njengomnikelo kuJehova, isifuyo esinikelwe kanjalo kuJehova siba ngcwele. 10Akumelanga asintshintshe kumbe enanisele esihle ngesibi, loba esibi ngesihle.

11Uma lokho akufungelayo kuyinyamazana engcolileyo – njalo ingamukeleki njengomnikelo kuJehova – kumele sinikwe umphristi, 12abone langabe sihle kumbe sibi. Lokho okuzatshiwo ngumphristi yikho okuzakwamukelwa. 13Uma umnikazi waso efuna ukuzihlenga kuzamele engezelele okwesihlanu phezu kwesilinganiso saso.

14“ ‘Nxa umuntu enikela indlu yakhe kuJehova njengolutho olungcwele, umphristi uzakwahlulela ukuthi inhle loba imbi. Loba yisiphi isilinganiso esizaqanjwa ngumphristi, yiso esizakwamukeleka. 15Nxa umuntu onikele indlu yakhe eseyihlenga, kuzamele engezelele okwesihlanu phezu kwesilinganiso sayo, indlu ibe ngeyakhe futhi.

16“ ‘Nxa umuntu enikela kuJehova ingxenye yensimu eyilifa lakhe, isilinganiso sayo sizakuba mayelana lenhlanyelo engahlanyelwa kuyo – amashekeli esiliva angamatshumi amahlanu kuhomeri lenhlanyelo yebhali. 17Uma enikela insimu yakhe ngomnyaka weJubhili, isilinganiso esimisiweyo sizahlala sinjalo.

18Kodwa uma enikela insimu yakhe emva kweJubhili, umphristi uzamisa isilinganiso sayo kusiya ngeminyaka esaseleyo kusiyafika umnyaka weJubhili olandelayo, njalo isilinganiso sayo esimisiweyo sizakwehliswa.

19Nxa umuntu onikela insimu yakhe efuna ukuhlenga, kumele engezelele okwesihlanu phezu kwesilinganiso sayo, insimu izakuba ngeyakhe futhi. 20Kodwa-ke uma insimu leyo engayihlengi, loba uma eseyithengise komunye, ayingeke ihlengwe futhi. 21Lapho insimu iyekelwa ngeJubhili, iba ngcwele, njengensimu enikelwe kuJehova iba yilifa lomphristi.

22“ ‘Nxa umuntu enikela kuJehova insimu ayithengayo, engasingxenye yensimu yelifa lakwabo, 23umphristi uzaqamba isilinganiso sayo kusiyafika emnyakeni weJubhili, kuthi umuntu lowo akhuphe isilinganiso sayo mhlalokho njengolutho olungcwele kuJehova.

24Ngomnyaka weJubhili insimu leyo izabuyela kulowo muntu eyathengwa kuye – onguye owayengumniniyo. 25Izilinganiso zonke kumele zenziwe ngokumayelana leshekeli lendlu engcwele – amagera angamatshumi amabili kushekeli elilodwa.

26“ ‘Akekho umuntu ongehlukanisela iNkosi izibulo lenyamazana, ngoba izibulo livele ngeleNkosi; loba lingelenkomo, loba imvu, ngeleNkosi. 27Uma ingenye yezinyamazana ezingcolileyo, umuntu angaphinda ayithenge ngesilinganiso esimisiweyo esengezelela okwesihlanu phezu kwesilinganiso. Uma engayihlengi, kuzamele ithengiswe ngesilinganiso esimisiweyo.

28“ ‘Kodwa akulalutho umuntu alalo aselunikele kuJehova – loba kungumuntu kumbe isifuyo loba insimu eyilifa lakwabo – olungathengiswa kumbe luhlengwe; konke okunikelwe kanjalo kungcwele kakhulu kuJehova.

29“ ‘Akulamuntu onikelwe ekubhujisweni ongahlengwa; kumele abulawe.

30“ ‘Okwetshumi kwakho konke okwelizwe, langabe ngamabele avela emhlabathini kumbe izithelo ezivela ezihlahleni, ngokukaJehova; kungcwele kuJehova. 31Uma umuntu ehlenga okunye kokwetshumi kwakhe, kumele engezelele kukho okwesihlanu kwesilinganiso sakho. 32Konke okwetshumi okwezinkomo lezimvu zonke izifuyo zetshumi ngaphansi kwentonga kamalusi, zizakuba ngcwele kuJehova. 33Akumelanga akhethe enhle kwembi kumbe ananisele ngenye. Uma esenanisela zombili izifuyo ziba ngcwele; azingeke zihlengwe.’ ”

34Le yimilayo uJehova ayinika uMosi entabeni yaseSinayi ukuba ayinike abako-Israyeli.